Таптыыбын кылгас сайыннаах
Тыйыс төрөөбүт дойдубун,
Кымыс – үүт сүөгэй быйаҥнаах
Сахам сирин таптыыбын
И.Павлов
Муус устар 27 күнүгэр
Сахабыт Өрөспүүбүлүкэтин күнүн бэлиэтиир үөрүүлээх тэрээһин болла.
«Сайдыы» СК, олохтоох библиотека, судаарыстыбаннас түмэлэ, Тулуна орто оскуолата холбоһуктаах олус диэн сэргэх тэрээһини көрдөрдүлэр. Ол курдук бастатан туран ыалдьыттары киириигэ арыылаах алаадьынан күндүлээтилэр, сахалыы сиэринэн — буруонан ыраастааһын туома оҥоһулунна, күргүөмүнэн Сахабыт Өрөспүүбүлүкэтин, Уус Алдан улууһун, 2-с Лөгөй нэһилиэгин өрөгөй ырыаларын ыллаатыбыт, Тулуна орто оскуолатын үөрэнээччилэрин толорууларыгар саха сирин туһунан монтаж аахтылар, 2-с Лөгөй нэһилиэгин аҕа баһылыга Петр Егорович Бурнашев бар дьонун эҕэрдэлээтэ, олохтоох судаарыстыбаннас түмэлин салайааччыта, нэһилиэкпит бочуоттаах олохтооҕо Бысыин Федот Дмитриевич сүрдээх дириҥ ис хоһоонноох доклад аахта, «Иэйии» — ырыа бөлөҕө, Гаврил Шепелёв, Наталья Гоголева уонна Айыына Троева тэттик да буоллар дойдубутугар тапталбыт кыымын өссө күүскэ күөдьүтэр эҕэрдэ нүөмэрдэри бэлэх ууннулар, манан тэрээһин үөрүүлээх чааһын түмүктээн баран нэһилиэкпит түөлбэлэрэ квиз викторинаҕа күөн көрүстүлэр, 5 түһүмэхтээх өй-мэйии тургутуутун түмүгүнэн «Кэскил» түөлбэ үһүс, «Сэмэн Баһылайап» түөлбэ иккис, «Дьулуур» түөлбэ бастакы миэстэлэри ылары ситистилэр.
Тэрээһин түмүгэр бары кэлбит көрөөччүлэри, кыттааччылары кытта өрө күүрүүлээх оһуохай түһүлгэтэ ньиргийдэ. Оһуохайы таһаардылар: эдэр, кэскиллээх оһуохайдьыт Сахалина Троева, Уус — Алдан улууһун оһуохайга күрэҕин «Хомоҕой тыллаах этээччи» анал аат хаһаайына, нэһилиэкпит дьокутаата Николай Копырин, Уус — Алдан улууһун оһуохайга күрэҕин кыайыылааҕа Ульяна Бурнашева.
Бука бары кыттааччыларбытыгар, ыалдьыттарбытыгар барҕа махталбытын тиэрдэбит! Саха буолан сандаарын — киһи буолан килбэйин!
Иһитиннэриини суруйда: Гаврил Шепелев
