Муус устар 30 күнүгэр Тулуна бөһүөлэгэр аан дойдутааҕы үҥкүү күнүн, «Сааскы тэтимнэр» үҥкүү куонкуруһунан бэлиэтээтилэр.
Куонкуруска уопсайа 6 үҥкүү бөлөҕө кытынна. Дьүүллүүр сүбэҕэ Мүрүтээҕи үҥкүү бөлөхтөрүн кыттыылаахтара биир дойдулаахпыт Виктория Сторожева, кийиит Ольга Гоголева уонна Тулунаттан өр сылларга култуура эйгэтигэр үлэлээбит Маргарита Неустроева үлэлээтилэр. Тэрээһин саҕаланыытыгар бырааһынньыгынан эҕэрдэлээн туран «Татыйык» оҕо уһуйаанын иитиллээччилэрэ олус сэргэх флеш-моб, Тулуна орто оскуолатын үөрэнээччилэрин толоруутугар «Сибэкки», 7кылаас үөрэнээччилэрэ Албан Гоголев, Нина Неустроева «Дьөһөгөй» диэн Платон Стрекаловскай туруорбут үҥкүүлэрин үҥкүлээтилэр.
Куонкуруһу арыйар чиэс, жеребьевка талбытынан Олохтоох дьаһалта уонна кыра тэрилтэлэр коллективтара, иккиһинэн «Сайа» бөлөх, үсүһүнэн «Татыйык» уһуйаан коллектива, төрдүһүнэн Тулуна оскуолатын коллектива, бэсиһинэн «Сайдыы» сынньалаҥ киин коллектива, алтыһынан «Эдэр ийэлэр» түмсүү үҥкүүлээтилэр. Бары бөлөхтөр күүстээх бэлэмнэрин, үҥкүүгэ дьоҕурдаахтарын көрдөрдүлэр. Түмүккэ дьүүллүүр сүбэ маннык диэн быһаарда:
Дипломант 2ст «Сайдыы» СК
Дипломант 1ст «Сайа» бөлөх
Лауреат 3ст олохтоох дьаһалта уонна кыра тэрилтэлэр коллективтара
Лауреат 2ст П.В.Аммосов аатынан ТСОШ коллектива
Лауреат 1ст «Татыйык» оҕо уһуйаанын коллектива
Гран при «Эдэр ийэлэр» түмсүү
Бары кыайыылаахтарга эҕэрдэ буолуохтун! Инникитин да үҥкүү кэрэ эйгэтигэр ситиһиилэри, тус олоххутугар дьолу-соргуну баҕарабыт!
Иһитиннэриини суруйда: Гаврил Шепелев
