«ИЙЭ ТЫЛ КҮНҮНЭН» (ДЕНЬ РОДНОГО ЯЗЫКА)
Конкурс на лучшее стихотворение, среди жителей села.
«Тыыннаах остуоруйа«
Отуттан тахса сыл
Орох тэппит суолбунан
Оргууй аҕай хаамаммын
Остуоруйалаах олбуорбар
Олус долгуйа киирэбин.
Хаһан эрэ бу тусаһаҕа
Өрдөөҕү өбүгэлэрбит
Төлөрүйбэт төрүттэрэ,
Лөгөй тойон сыдьаана,
Улуус кулубата,
Нэһилиэк кинээһэ
Олорон ааспыта үһү.
Бэрэбинэ бэрдин
Буруустуу суордаран,
Дьааһык курдук ыпсаран,
Дьаарыстаан таһааран,
Алтаардаан айгыстан,
Кууппаллаан хоротон,
Кириэстээн килбэтэн,
Кыһыл оҕону сүрэхтиир,
Кыра-хара норуот
Кыһалҕатын кэпсэнэр,
Үөрүүтүн да үллэстэр,
Таҥараҕа үҥэр-сүктэр
Чочуобуна дьиэни туттаран.
Киил мас эркиннээх,
Таптайыы тимир иэччэхтээх,
Хайырҕастаах халҕаннаах,
Үс ааннаах ампаардаах,
Сатыы саарыыр,
Аттаах аарыыр,
Сабыллыбат ааннаах,
Самныбат балаҕаннаах,
Кылыкынай кулуба
Тэпсилгэннээх тиэргэнэ
Тыыннаах остуоруйа буолан
Бүгү күҥҥэ кэллэҕэ.
Урукку дьыллар кистэлэҥнэрин,
Кэпсээннэрин, сэһэннэрин
Эмэҕирбит эркиннэрэ
Иҥэринэн турдахтара.
Оҕо саас остуоруйата,
Нэһилиэгим остуоруйата
Бу олбуорга ситимнэспиттэр,
Тыыннаах туоһу буолбуттар.
Сергеева М.Н.
Тулуна, 11.02.2022