Хайыһар өрөспүүбүлүкэтээҕи турнирыгар “Азия оҕолорун” чөмпүйүөнэ Николай Копырины чиэстээтибит
Кулун тутар 18-19 күннэригэр Тулуна бөһүөлэгэр 2-с Лөгөй нэһилиэгин хайыһардьыттарын бирииһигэр СӨ хайыһарга IV этээбэ ыытылынна. Күрэхтэһии тэрийээччилэринэн СӨ хайыһарга федерацията, өрөспүүбүлүкэтээҕи хайыһар успуордун оскуолата, 2-с Лөгөй нэһилиэгин дьаһалтата, П.В. Аммосов аатынан Тулуна орто оскуолата буоллулар.
Саха АССР хас да төгүллээх чөмпүйүөнэ, Саха АССР сүүмэрдэммит хамаандатын чилиэнэ Егор Габышев, хайыһарга Саха АССР успуордун маастара Семен Дегтярев, хайыһарга Саха АССР успуордун маастара Иннокентий Мигалкин, хайыһар успуордун бэтэрээнэ Раиса Троева, хайыһарга ССРС успуордун маастарыгар кандидат Семен Иванов курдук, о.д.а. чулуу спортсмен, хайыһардьыт дьоммутунан нэһилиэкпит дьоно-сэргэтэ киэн туттабыт, кинилэр саҕалаабыт ситиһиилээх, кыайыылаах суоллара күн бүгүн билиҥҥи ыччаппытыгар салҕанар!
Күрэхтэһиигэ өрөспүүбүлүкэбит араас муннугуттан 170-тан тахса спортсмен кэлэн икки күн устата күөн көрүстүлэр. Бастакы күн классическай, иккис күн көҥүл стильгэ оскуола оҕолоро, улахан дьон, бэтэрээннэр араас дистанцияҕа сүүрдүлэр. Биһиги нэһилиэкпит оҕолоро Николай Копырин, Николай Охлопков, Айтал Терешкин ситиһиилээхтик кытыннылар, биир дойдулаахтарын үөртүлэр.
Бу өрөспүүбүлүкэтээҕи күрэхтэһиигэ Кузбасска ыытыллыбыт норуоттар икки ардыларынааҕы «Азия оҕолоро» 2-с кыһыҥҥы оонньууларыгар хайыһарга «Доҕордоһуу эстафетатыгар» бастаан кыһыл көмүс мэтээли ылбыт Николай Копырины, оонньууларга ситиһиилээхтик кыттыбыт Николай Охлопковы уонна кинилэр тренердэрин Станислав Копырины, Яков Попову чиэстээтилэр. Улууспут баһылыга Алексей Федотов, нэһилиэк баһылыга Иннокентий Троев, СӨ хайыһарга Федерациятын бэрэссэдээтэлэ Семен Иванов, улууспут тэрилтэлэрин салайааччылара оҕолору, тренердэри бу үрдүк ситиһиилэринэн эҕэрдэлээн туран, харчынан бириэмийэлэри, бэлэхтэри туттардылар.
✍️ Альбина Дегтярева, баһылыгы солбуйааччы
